വിന്‍സന്റ്‌ വാന്‍ഗോഗ്‌ ഇന്ന്‌ ഒരു മിത്താണ്‌. മാനസിക, ലൈംഗിക രോഗങ്ങളാല്‍ വലഞ്ഞ്‌ ജീവിതം ഹോമിച്ച ഒരു കലാകാരന്‍.

കലയ്ക്ക്‌ വേണ്ടി ജീവിച്ച ഒരു മനുഷ്യന്‍ സ്വന്തം ചെവി മുറിച്ച്‌ ഭ്രാന്ത്‌ ആഘോഷിച്ചുവെന്നാണ്‌ ചര്‍ച്ച. വിദ്യാര്‍ത്ഥികള്‍ക്ക്‌ പഠിക്കാനൊരു കാറ്റഗറിയും വിഷയവുമാണ്‌ വാന്‍ഗോഗ്‌. എങ്കിലും, ഞാന്‍ പുതിയൊരു വാന്‍ഗോഗിനെ അന്വേഷിക്കുകയാണ്‌. വാന്‍ഗോഗല്ല ചെവി മുറിച്ചത്‌ എന്ന്‌ ഈ നോവല്‍ വായിച്ചാല്‍ വ്യക്തമാവും. അതിനു ഇടവരുത്തിയ സാഹചര്യം ഒരു നോവലിസ്റ്റിന്റെ ഭാവനയുടെ സ്വാതന്ത്ര്യം ഉപയോഗിച്ചും പുതിയ ഗവേഷണങ്ങളുടെ അടിസ്ഥാനത്തിലും യുക്തിയുടെ പിന്‍ബലം മറയാക്കിയും ഇവിടെ അവതരിപ്പിക്കുകയാണ്‌.

തിയോഡോര്‍ എന്ന സാങ്കല്പിക നോവലിസ്റ്റ്‌ വാന്‍ഗോഗിനെക്കുറിച്ചുള്ള ചില അസാധാരണ റിപ്പോര്‍ട്ടുകള്‍ തേടിപ്പിടിച്ച്‌ വായനക്കാരുടെ മുമ്പില്‍ വയ്ക്കുകയാണ്‌. തിയോഡോര്‍ സമാഹരിക്കുന്ന കുറിപ്പുകളുടെ രൂപത്തിലാണ്‌ നോവല്‍ പ്രത്യക്ഷപ്പെടുന്നത്‌. ഇതില്‍ ഭാവനാധിഷ്ഠിതമായ കഥാപാത്രങ്ങളും സന്ദര്‍ഭങ്ങളുമുണ്ട്‌.

അവനവനോട്‌ സത്യസന്ധനാകാന്‍ വിധിക്കപ്പെട്ട ഒരു കലാകാരന്‍ എങ്ങനെയാണ്‌, ഏത്‌ കാലത്തും വ്യവസ്ഥാപിത കൗശലങ്ങള്‍ക്ക്‌ പുറത്താകുന്നതെന്ന്‌ ഈ വാന്‍ഗോഗ്‌ കാണിച്ചുതരും.

വാന്‍ഗോഗിന്റെ പെയിന്റിംഗുകള്‍ ഉപയോഗിച്ച്‌ സാബു പുതുപ്പറമ്പന്‍ വരച്ച 10 കവര്‍ ചിത്രത്തോടെയാണ്‌ നോവല്‍ പുറത്തു വരുന്നത്‌. അദ്ദേഹത്തിന്‌ നന്ദി രേഖപ്പെടുത്തുന്നു. വാന്‍ഗോഗിന്റെ ചിത്രങ്ങള്‍ കൊണ്ട്‌ ഇത്രയും മുഖചിത്രങ്ങള്‍ ഉണ്ടാകുന്നത്‌ ആദ്യമായിരിക്കും.

- എം.കെ.ഹരികുമാര്‍