നോവലിസ്റ്റ്‌ തിയോഡോറിന്റെ മുഖവുര

ലോകപ്രശസ്ത ഡച്ച്‌ ചിത്രകാരനായ വിന്‍സന്റ്‌ വാന്‍ഗോഗിന്റെ മരണം സ്വയം വെടിവച്ചായിരുന്നു. എന്നാല്‍ അദ്ദേഹം സ്വന്തം ചെവി എന്തിനു മുറിച്ചു, ആരാണ്‌ അത്‌ യഥാര്‍ത്ഥത്തില്‍ ചെയ്തത്‌ എന്നീ വിഷയങ്ങളില്‍ ധാരാളം ചര്‍ച്ചകള്‍ നടന്നുകഴിഞ്ഞിരിക്കുന്നു. വാന്‍ഗോഗ്‌ സ്വന്തം ചെവിമുറിച്ച്‌ കാമുകിക്ക്‌ കൊടുത്തു എന്ന്‌ പറയുന്നത്‌ ഒരു സത്യമല്ലെന്ന്‌ ചിന്തിക്കുന്നവരുണ്ട്‌.

വാന്‍ഗോഗ്‌ മരണമടഞ്ഞ്‌ മൂന്ന്‌ ദിവസത്തിനുള്ളില്‍ ഫ്രാന്‍സിലെ ചില പത്രങ്ങളില്‍ വന്ന റിപ്പോര്‍ട്ടുകളാണ്‌ ഇവിടെ സമാഹരിക്കുന്നത്‌. തിയോഡോര്‍ എന്ന നോവലിസ്റ്റാണ്‌ സവിശേഷതയാര്‍ന്ന അഞ്ച്‌ ഖണ്ഡങ്ങള്‍ തിരഞ്ഞെടുത്തിരിക്കുന്നത്‌. ഇതില്‍ ആദ്യത്തെ രണ്ട്‌ റിപ്പോര്‍ട്ടുകള്‍ യഥാക്രമം നിക്കോളാസ്‌ വിൽഹെം, സ്റ്റാന്‍ലി പയസ്‌ എന്നിവര്‍ എഴുതിയതാണ്‌. മൂന്നാമത്തേത്‌ മാര്‍സല്‍ യൂബേ എന്ന പത്രപ്രവര്‍ത്തകന്‍ വാന്‍ഗോഗിന്റെ കലാ ജീവിതത്തിലെ ചില സംഭവങ്ങള്‍ ചേര്‍ത്തുവച്ച്‌ എഴുതിയ ജീവചരിത്ര വിവരണമാണ്‌. നാലാമത്തേത്‌, വാന്‍ഗോഗിന്റെ പ്രിയസുഹൃത്തും സഹവാസിയുമായിരുന്ന പോള്‍ ഗോഗിന്റെ ഡയറിയില്‍ നിന്നുള്ള കുറേ ഭാഗങ്ങളാണ്‌. അഞ്ചാമത്തേത്‌, വാന്‍ഗോഗ്‌ സ്വയം വെടിവച്ച്‌ മരിക്കുന്നതിനു മുമ്പ്‌, തന്റെ മുറിയില്‍ വന്ന അപരിചിതയോട്‌ സംസാരിച്ചതിനെ ആധാരമാക്കി പോള്‍ ഫയദോര്‍ എന്ന ചലച്ചിത്രകാരന്‍ ഒരു പത്രത്തിനു നല്‍കിയ റിപ്പോര്‍ട്ടിലെ കുറച്ചു ഭാഗമാണ്‌. മരണത്തിലേക്ക്‌ നയിച്ച സംഘര്‍ഷം ഇതില്‍ വ്യക്തമാണ്‌. ഇത്രയും തിരഞ്ഞെടുക്കുന്നത്‌, വാന്‍ഗോഗ്‌ സ്വന്തം കാതുമുറിച്ചു എന്ന നുണ തിരുത്തുന്നതിനു വേണ്ടിയാണ്‌. അതിനുള്ള തെളിവുകള്‍ നിരത്താന്‍ റിപ്പോര്‍ട്ടുകള്‍ക്കും ഗോഗിന്റെ ഡയറിക്കും കഴിയുമെന്ന്‌ വിശ്വസിക്കുന്നു.

വാന്‍ഗോഗ്‌ പുറംലോകത്തെ നിരാകരിക്കുകയല്ല ചെയ്തത്‌; തനിക്ക്‌ വഴങ്ങാത്ത യുക്തിയും ഗര്‍വ്വും പുലര്‍ത്തിയ ആ ലോകത്തെ തന്റേതായ രീതിയില്‍ മിതപ്പെടുത്തുകയും ചിട്ടപ്പെടുത്തുകയുമാണ്‌ ചെയ്തത്‌. പുറത്തേക്ക്‌ പോകാന്‍ തന്നെപ്പോലെയുള്ള മനസുകളാണ്‌ ആ ചിത്രകാരന് വേണ്ടിയിരുന്നത്‌. അത്‌ ലഭിക്കില്ല എന്ന്‌ ബോധ്യമായതോടെ അദ്ദേഹം തന്റെയുള്ളിലേക്ക്‌ തന്നെ ആ ലോകത്തെ അന്വേഷിച്ചുപോയി. പ്രക്ഷുബ്ധമായ ഒരു മനസ്‌ അതിന്റെ തന്നെ പൊട്ടിത്തെറിയില്‍ നിന്ന്‌ രക്ഷനേടുന്നതിനുള്ള ഉപായം കണ്ടെത്തും. **** ****